7400 жүргізуші көлік басқару құқығынан айырылды

Қазақстанда мыңдаған жүргізуші денсаулығына байланысты көлік басқару мүмкіндігінен айырылды. Денсаулық сақтау министрлігінің мәліметінше, ел бойынша 21 мыңнан астам адамның көлік жүргізуге медициналық қарсы көрсетілімі бар.

Медициналық шектеулер анықталғаннан кейін полиция 13 мыңнан астам істі сотқа жолдаған. Соның нәтижесінде заңды күшіне енген сот шешімдері негізінде 7400 жүргізуші куәлігі жарамсыз деп танылды. Енді бұл азаматтарға көлік басқаруға болмайды.

Мамандардың айтуынша, жүргізушінің денсаулық жағдайы жолдағы қауіпсіздікке тікелей әсер етеді. Сондықтан белгілі бір аурулар мен медициналық жағдайлар кезінде көлік жүргізуге заң бойынша шектеу қойылады.

Атап айтқанда, эпилепсиямен ауыратын, екі көзінің де көру қабілеті талапқа сай келмейтін, психикалық аурулары бар немесе есірткі және өзге де тыйым салынған заттарды қолданатын адамдарға көлік басқаруға рұқсат етілмейді.

Көлік жүргізуге кедергі келтіретін аурулар мен медициналық жағдайлардың нақты тізімі Денсаулық сақтау министрлігінің тиісті бұйрығымен бекітілген.

Бұл талаптардың негізгі мақсаты – жүргізушінің ғана емес, жолдағы басқа да адамдардың қауіпсіздігін қамтамасыз ету. Себебі көлік тізгініндегі адамның денсаулығына байланысты туындаған кез келген жағдай ауыр жол-көлік оқиғасына әкелуі мүмкін.

Осыған байланысты медициналық қарсы көрсетілімі бар азаматтардың көлік басқаруына жол бермеу – жол қауіпсіздігін қамтамасыз етудің маңызды тетіктерінің бірі.