Қызылорда облысы: Испандықтармен біріккен игі бастама

Мемлекет Басшысының инвестиция тарту жұмысын күшейту бойынша тапсырмасына сәйкес Қызылорда облысы шетелдік инвесторлармен байланысты нығайтуда, деп хабарлайды FASTNEWS.KZ.

Солардың бірі — санитарлық-техникалық бұйымдар өндірісі саласында тәжірибесі қалыптасқан Испаниялық Roca Group компаниясы. Қос тараптың байланысы негізінде жақында Қызылорда қаласында санитарлық-техникалық бұйымдар шығаратын зауыттың құрылысы басталмақ. Зауыттың ашылуы ішкі нарықты отандық құрылыс материалдарымен қамтамасыз етуге мүмкіндік береді. Бұл туралы облыстық кәсіпкерлік және өнеркәсіп басқармасының басшысы Дәурен Әбілқайыров айтты.

«12 маусым күні Қызылорда облысы үшін маңызды қадам жасалды. Әлемдік деңгейдегі Roca Group компаниясымен бірлесіп, еліміздегі алғашқы санитарлық-техникалық бұйымдар өндірісін іске қосу бойынша Қазақстан Республикасы Өнеркәсіп және құрылыс министрлігі, облыс әкімдігі және компания арасында негіздемелік келісімге қол қойылды. Осы келісім негізінде 300 жаңа жұмыс орны ашылады. Қазіргі таңда зауыт салуға 20 га жер телімі белгіленген. Зауыт Орталық Азиядағы құрылыс саласындағы ең ірі жобалардың біріне айналады. Бұл – өңіріміздің табиғи ресурстары мен инвестициялық әлеуетінің нақты көрінісі. Біздің басты міндетіміз – инвесторларға барынша қолайлы жағдай жасап, жобаны сапалы әрі уақтылы іске асыру. Жоба тек облыс үшін емес, тұтас Қазақстанның өндірістік әлеуеті үшін маңызды бастама», дейді Дәурен Тұрғанбайұлы.