Путин пасха мерекесіне орай Украинаға қатысты бітім жариялады
Ресей президенті Владимир Путин 11 сәуір сағат 16:00-ден 12 сәуір күнінің соңына дейін «пасхалық бітім» жариялады.
Ресей қарулы күштерінің жоғарғы бас қолбасшысы Владимир Путиннің шешімімен, алда келе жатқан православтық Пасха мерекесіне байланысты 11 сәуір сағат 16:00-ден 12 сәуір күнінің соңына дейін бітім жарияланады.
«Ресей Федерациясының қорғаныс министрі Андрей Белоусовқа, қарулы күштер бас штабының бастығы – біріккен әскерлер тобының қолбасшысы, армия генералы Валерий Герасимовқа осы кезеңде барлық бағыттар бойынша әскери әрекеттерді тоқтату жөнінде тапсырма берілді. Әскерлер қарсы тараптың ықтимал арандатуларының, сондай-ақ кез келген агрессивті әрекеттерінің алдын алуға дайын болуы тиіс», деп хабарлады Кремль.
Владимир Путин Украина тарапы да Ресей Федерациясының үлгісін ұстанатынына сенім білдірген.
Фото: ашық дереккөз
