Қазақстан алтын қоры бойынша әлемдік рейтингте үздік үштікке енді
2025 жылдың тамыз айында Қазақстан Ұлттық банкі әлемдегі ең ірі алтын сатып алушы орталық банк атанды. Есепті айда елдің алтын қоры 8 тоннаға ұлғайып, жалпы көлемі 316 тоннаға жетті. Бұл өткен жылдың басымен салыстырғанда 10,1 пайызға артық көрсеткіш болып саналады, деп хабарлайды El.kz интернет порталы.
Жыл басынан бері, яғни қаңтар–тамыз аралығында Қазақстанның алтын қоры 32 тоннаға артқан. Осы нәтижемен еліміз әлем бойынша Польша мен Әзербайжаннан кейінгі үшінші орынға шықты. Тамыз айының өзінде орталық банктердің жиынтық алтын қоры 15 тоннаға ұлғайған.
Халықаралық алтын кеңесінің дерегінше, соңғы айларда әлемдік нарықта алтын бағасы бірнеше рет тарихи максимумға жеткен. Бұл жағдай орталық банктердің сатып алу көлемін белгілі бір деңгейде шектегенімен, олардың алтынға деген қызығушылығы азайған жоқ. Сарапшылардың пікірінше, көптеген мемлекеттер алтынды қаржылық тұрақтылықтың кепілі және стратегиялық актив ретінде сақтауды жалғастырып келеді.
Есепті кезеңде алтын қорын 1 тоннадан астам арттырған жеті мемлекет тіркелді. Бұл тізімде Қазақстаннан бөлек Болгария, Түркия, Қытай, Өзбекстан, Чехия және Гана бар. Ал Ресей мен Индонезия өз қорларын азайтып, сәйкесінше 3 және 2 тонна алтын сатқан.
Осылайша, Қазақстан Ұлттық банкі 2025 жылдың тамызында әлемдік алтын нарығында көш бастап, елдің алтын қоры 316 тоннаға жетті. Бұл көрсеткіш еліміздің қаржылық тұрақтылығы мен алтын-валюта резервтерін әртараптандыру саясатының тиімділігін айқын дәлелдейді.
Фото: Ашық дереккөзден
