Абылай ханның есіміне «Ұлы» деген эпитетті бекіту туралы қоғамдық бастама көтерілді
«Сенімен болашақ» республикалық қоғамдық бірлестігі Қазақ хандығының билеушісі Абылай ханның есіміне «Ұлы» деген құрметті эпитетті бекіту туралы қоғамдық бастама көтерді,- деп хабарлайды FASTNEWS.KZ — ақпараттық сайты.
Идея авторы әрі бірлестіктің құрылтайшысы Нұркен Асанов бұл бастаманы тарихқа деген құрмет деп атады.
«Бұл бастама тұлғаның айрықша тарихи рөлін мойындауға негізделген. Себебі әрбір кемелденген қоғам мемлекеттіліктің қалыптасуында шешуші рөл атқарған тұлғалардың есімін сақтауға ұмтылады. Абылай хан ауыр сын-қатер кезеңінде елді ұйыстырып, ішкі бірлікті нығайта білді, оңтайлы әрі көреген сыртқы саясат жүргізді, сондай-ақ қазақ мемлекетінің саяси дербестігін сақтап қалды. «Ұлы Абылай хан» атауын бекіту – тарихи әділеттіліктің көрінісі, қоғамдық сана-сезімнің айғағы және Қазақстанның күші мен бірлігін айқындап отырған мұраға деген құрметтің белгісі», – деді қоғамдық бірлестіктің құрылтайшысы Нұркен Асанов.
Фото: Ашық дереккөз
Бірлестік арнайы декларация жасап, көпшілік талқысына ұсынды. Тарихи жад декларациясын сілтеме арқылы өтіп, оқи аласыз.
