Қызылорда қаласында 26 аулада заманауи ойын және спорт алаңдары салынады
Қызылорда қаласында аулалар жаңарып, тұрғындарға қолайлы орта қалыптасуда,- деп хабарлайды FASTNEWS.KZ — ақпараттық сайты.
Биыл қала аумағындағы 26 аулада жаңа ойын және спорт алаңдарын салу жоспарланған. Жобаны жүзеге асыруға жергілікті бюджеттен 1,9 млрд теңге бөлінді. Бұл қаражат аулаларды кешенді абаттандырып, тұрғындарға қолайлы әрі қауіпсіз орта қалыптастыруға бағытталмақ.
Жаңарған аулаларда балалардың бос уақытын тиімді өткізуіне арналған заманауи әткеншектер мен сырғанақтар, сондай-ақ түрлі жаттығу құрылғылары орнатылады. Спортқа қызығушылық танытатын тұрғындар үшін кіші футбол және воркаут алаңдары қарастырылған.
Жоба аясында ойын және спорт нысандарымен ғана шектелмей, аулалардың жалпы келбетін жақсартуға да басымдық берілуде. Атап айтқанда, аумақтарға жарық шамдары қойылып, тұрғындардың тынығуына арналған демалыс орындары жасақталады. Сонымен қатар көгалдандыру және абаттандыру жұмыстары жүргізіліп, аулалардың эстетикалық көрінісі жаңара түседі.
Мұндай жобалар балалардың қауіпсіз жерде ойнап, спортпен шұғылдануына мүмкіндік беріп қана қоймай, тұрғындардың өз ауласында уақытын жайлы өткізуіне жағдай жасайды. Нәтижесінде көпқабатты үйлердің аулалары тұрғындар үшін жай ғана аумақ емес, демалыс, спорт және қарым-қатынас орталығына айналмақ.
