Грантпен білім алған түлектердің жұмыспен өтеу тәртібі өзгерді

Қазақстанда мемлекеттік білім беру гранты есебінен білім алған түлектердің жұмыспен өтеуіне қатысты бірқатар өзгеріс енгізілді. Жаңа талаптар авиация мамандарына, PhD докторларына, әскери қызметшілерге және әлеуметтік санаттарға қатысты.

Авиация мамандары бес жыл жұмыс істеуге міндетті

2026 жылғы 25 тамыздан бастап күшіне енген өзгерістерге сәйкес, авиация саласының мамандары үшін грант бойынша білім алғаннан кейінгі міндетті жұмыспен өтеу мерзімі 3 жылдан 5 жылға дейін ұзартылды.

Бұл талап 2026 жылы жоғары оқу орнына оқуға түскен азаматтарға қолданылады. Яғни бұған дейін білім алған түлектерге жаңа бес жылдық талап кері күшпен жүрмейді.

PhD докторларына жұмыс істеуге болатын ұйымдар тізімі кеңейді

Философия докторларының (PhD) жұмыспен өтеу міндетін орындауына қатысты талаптар да өзгерді.

Енді PhD докторларына жұмыспен өтеу үшін ұйымдардың таңдауы кеңейді. Олар міндетін білім беру ұйымдарында, ғылыми ұйымдарда және мемлекеттік органдарда еңбек ету арқылы орындай алады.

Бұл өзгеріс докторантура тәмамдаған мамандардың алған білімін ғылыммен қатар білім беру және мемлекеттік басқару салаларында қолдануына мүмкіндік береді.

Әскери қызмет өткергендер жұмыспен өтеуден босатылады

Әскери қызметке қатысты да жаңа жеңілдік қарастырылған. Әскерге шақыру бойынша белгіленген мерзімін өткерген немесе келісімшарт бойынша әскери қызмет атқарған азаматтар грант бойынша жұмыспен өтеу міндетінен толық босатылады.

Әлеуметтік санаттарға да жеңілдіктер берілді

Жаңа тәртіп бойынша әлеуметтік жағдайына байланысты бірқатар азаматтар жұмыспен өтеу міндетінен босатылады.

Олардың қатарында:

I және II топтағы мүгедектігі бар адамдар;
мүгедектігі бар балаларды тәрбиелеп отырған немесе оларға күтім жасайтын, тиісті жәрдемақы алушылар;
жұбайы тұратын елді мекенде мамандығына сәйкес бос жұмыс орны жоқ азаматтар;
жүкті әйелдер;
үш жасқа дейінгі баласы бар азаматтар бар.

Осылайша, грантпен білім алған түлектердің жұмыспен өтеу тәртібі бірнеше санат бойынша қайта қаралды. Өзгерістер бір жағынан еңбек нарығына қажетті мамандарды бекітуге бағытталса, екінші жағынан әскери қызмет өткерген және әлеуметтік жағдайы ерекше азаматтарға жеңілдік береді.