Азаматтық белсенділік – ел болашағына қосылған үлес
Қоғамның өркендеуі әрбір азаматтың белсенділігі мен жауапкершілігіне тікелей байланысты. Елдің қоғамдық-саяси өміріне қатысу, маңызды науқандарда өз таңдауын жасау – саналы азаматтың басты міндеттерінің бірі. Осы ретте 23 тамызда өтетін Құрылтай сайлауының маңызы ерекше.
Құрылтай – қоғам мен билік арасындағы өзара байланысты нығайтып, тұрғындардың ұсыныс-пікірін ортақ талқыға салатын маңызды қоғамдық институт. Оның құрамына өңірдің дамуына бейжай қарамайтын, халықтың сеніміне ие болған азаматтардың сайлануы қоғамдық бастамалардың сапалы жүзеге асуына ықпал етеді.
Әрбір дауыс – ел болашағына деген жауапкершіліктің көрінісі. Сайлауға қатысу арқылы тұрғындар өздерінің азаматтық ұстанымын білдіріп қана қоймай, өңірдің әлеуметтік-экономикалық дамуына бағытталған бастамаларды қолдауға мүмкіндік алады. Белсенді қоғам ғана тұрақты даму мен бірліктің берік негізін қалыптастырады.
Қазіргі таңда қоғамдық келісім мен ел бірлігін нығайту – баршамызға ортақ міндет. Осы жолда әрбір азаматтың белсенділігі, заңмен берілген құқығын тиімді пайдалануы және қоғамдық өмірге араласуы ерекше маңызға ие. Өйткені ел тағдырына қатысты маңызды шешімдер халықтың қатысуымен қабылданғанда ғана олардың өміршеңдігі арта түседі.
23 тамыз күні өтетін Құрылтай сайлауына қатысу – әр азаматтың қоғам алдындағы жауапкершілігін көрсететін маңызды қадам. Барша тұрғындарды сайлауға белсенді қатысып, өз таңдауларын жасауға шақырамыз. Себебі елдің ертеңі мен өңірдің дамуы – әрқайсымыздың азаматтық ұстанымымыз бен белсенділігімізге байланысты.
