Тұтынушының қаржысы қайтарылды
2025 жылғы сәуір айының соңында Астана қаласының тұрғыны Литва еліне жұмысқа орналастыру қызметін сатып алып, Kaspi бөліп төлеу арқылы 500 000 теңге, қосымша лауазым дайындау үшін 18 000 теңге төлеген. Сатып алу оның жұбайының атына рәсімделген. Қызмет Қазақстан азаматтарын шетелге жұмысқа жіберуге маманданған жеке компания тарапынан ұсынылған.
Алайда көп ұзамай тұтынушының отбасында күрделі жағдай туындаған: жаңа туған баласына ауыр туа біткен патологиялар диагнозы қойылып, шұғыл хирургиялық араласу мен тұрақты күтім қажет болды. Осыған байланысты шетелге шығу мүмкін болмай қалды.
Қызмет көрсетілмеді
Тұтынушы компания өкіліне дер кезінде жүгініп, сатып алудан бас тартуға өтініш білдірді, себебі:
- виза мен тұруға рұқсат алу үшін қажетті құжаттар тапсырылмаған;
- жұмысқа орналастыру процесі басталмаған;
- компания ешқандай шығынға ұшырамаған.
Қазақстан Республикасының «Тұтынушылардың құқықтарын қорғау туралы» Заңына сәйкес, егер қызмет көрсетілмесе, тұтынушы келісім жасалған күннен бастап 14 күнтізбелік күн ішінде одан бас тартуға құқылы.
Алайда заңды негіздерге қарамастан, компания менеджері ақшаны қайтарудан бас тартқан. Барлық қарым-қатынас тек мессенджер арқылы жүргізіліп, менеджер тұтынушының «SMS арқылы келісімшартқа қол қойғанын» алға тартты. Алайда ешқандай растайтын хабарламалар ұсынылған жоқ. Түн мезгілінде тұтынушыға қолтаңбасыз, тек жеке деректері енгізілген Word құжаты жіберілген, ол заңды күші жоқ құжат болып табылады.
Сонымен қатар, басшылықтың байланыс нөмірін беру туралы сұраныстарға жауап берілмеген.
Ақша қалай қайтарылды?
Жағдайды бейбіт жолмен шешуге жасалған сәтсіз әрекеттерден кейін тұтынушы Астана қаласының сауда және тұтынушылардың құқықтарын қорғау департаментінен кеңес алып, компания атына сотқа дейінгі наразылық хатын жолдады. Бұл хатта Қазақстан заңнамасына сәйкес ақшаны қайтару туралы нақты талаптар көрсетілген болатын.
Тек осы сотқа дейінгі наразылық хатын алғаннан кейін ғана компания толық соманы қайтарды.
Басқа тұтынушылар нені білуі керек?
🔹 Егер қызмет 14 күн ішінде көрсетілмесе, одан бас тартып, толық соманы қайтаруға болады;
🔹 Барлық түбіртектерді, хат алмасу скриншоттарын және төлем дәлелдерін сақтап қойыңыз;
🔹 Келісімшарт екі тараптың қолымен расталуы тиіс – мессенджердегі жазысу заңды құжат болып саналмайды;
🔹 Сатушы тарапынан жауап болмаған жағдайда, Сауда және тұтынушылардың құқықтарын қорғау департаментіне жүгініп, кеңес алыңыз.
Тұтынушылардың құқықтарын қорғау комитетінің Баспасөз қызметі
