Елімізде мыңнан астам ауыл ұялы байланыссыз әрі интернетсіз отыр. Жаһан жұрты ғаламтор игілігін тұтас көріп жатқанда, бұл аймақтардың тұрғындары виртуалды әлемнен әлі де тыс қалып отыр. Байланыс болғанымен, сапасы сын көтермейтін аудандар да бар. Мемлекет басшысы 2027 жылдың соңына дейін елді мекендерді жоғары жылдамдықты интернетпен қамтуды тапсырған еді. Жауапты министрлік жол картасын әзірлеп, жүйелі жұмыс істеуге бел буып отыр. Президент тапсырмасының орындалу барысын білу мақсатында жауапты тұлғаларға сауал жолдап көрдік. Бүгінгі жазбамызда Қызылорда облысындағы ауылдарды интернетпен қамту жайын талқылаймыз. Осы орайда, Қызылорда облыс әкімі аппараты басшысының орынбасары Дәурен Ыдырыспен сұхбаттастық.

/Сурет ашық дерек көзден алынды

— Дәурен Серікұлы, сұхбатқа келіскеніңізге көп рақмет. Алдымен өңір жайлы айтсақ, аймақта қанша ауыл бар және интернетпен қамту деңгейі қандай?

 — Қызылорда облысы бойынша 223 ауылдық елді мекен бар, оның ішінде 207 ауылдық елді мекен интернетпен қамтамасыз етілген. Пайыздық үлесі 92,8% құрайды. Мобильді интернетпен қамтылмаған 16 шалғай ауылдық елді мекен. Осы тұста айтайық, ол елді мекендердегі тұрғындардың саны 250 адамнан кем. Талшықты-оптикалық байланыс желісімен 135 елді мекен қамтылған. 2023-2027 жылдар аралығында ҚР Цифрлық даму, инновациялар және аэроғарыш өнеркәсібі министрлігінің «Қолжетімді интернет» ұлттық жобасы аясында ауылдық елді мекендерге кең жолақты интернет жүргізілетін болады. Ұлттық жоба көрсеткіштеріне қол жеткізу мақсатында облыс әкімімен Қызылорда облысының елді мекендерін сапалы кең жолақты қолжетімділікті қамтамасыз ету жөніндегі Жол картасы бекітілді. Жол картасына сәйкес 2024 жылы «Кселл»  АҚ  21 елді мекенді, «Кар-Тел» ЖШС 10 елді мекенді сапалы кеңжолақты мобильді интернетпен қамтамасыз етті. Мобильді интернетпен қамтылмаған 16 ауылдық елді мекеннің 4-і, атап айтсақ, Мойнақ, Тастүбек, Жуантөбе, Ақтам мобильді интернетпен қамтамасыз етілетін болады. Бас-аяғы 2027 жылдың соңына дейін 59 ауыл талшықты оптикалық байланысқа қосылады, 14 ауыл KAZSAT спутнигі арқылы интернетке қосылады деп жоспарлануда.
— Интернет сапасы қай деңгейде? 5G технологиясының тарту аймағын ұлғайту да күн тәртібінде. Бұл бойынша өңірде қандай жұмыстар жүргізілуде?
— Жоғары жылдамдықты интернетпен қамтамасыз ету мақсатында Қызылорда қаласында 5G технологиясының 40 нүктесі жұмыс істейді. Оның ішінде Kcell операторының 33 базалық станциясы, Tele2 байланыс операторының 7 нүктесі қызмет көрсетіп тұр. 2025 жылы 5G нүктелерінің санын 80-ге жеткізу жоспарлануда.
/Сурет ашық дерек көзден алынды
— Ауылдық аймақтардан бөлек, автомобиль жолдарындағы ұялы байланыс сапасын жақсарту бағытында қандай жұмыстар жүргізілуде?
— «Қолжетімді интернет» Ұлттық жобасы аясында  Қызылорда облысы бойынша «Қызылорда-Жезқазған» автожолы бойына және «Батыс Еуропа – Батыс Қытай» автожолында 9 антенна-діңгек құрылыстарын салу жоспарлануда. Антенна-діңгек құрылыстарын орналастыру координаттары Арал, Сырдария, Шиелі, Жаңақорған аудандарының аумағында. Нәтижесінде 2027 жылға дейін автожол бойлары сапалы байланыспен қамтамасыз етілетін болады. Қазіргі таңда жоба-сметалық құжаттамалары дайындалып, ҚР Цифрлық даму министрлігіне жолданатын бюджеттік өтінім әзірленуде. Жоба республикалық бюджеттен қаржыландырылады деп жоспарлануда.
— Сұхбаттың соңғы сұрағы болсын. Өзіңіз жетекшілік жасайтын цифрландыру бағытта тағы бір тармағы бейнебақылау камераларымен қамту ісі жайлы айтып берсеңіз.
— Қызылорда облысының барлық аудандарында бейнебақылау камералары орнатылып, Жедел басқару орталықтарына қосылды. Заманауи жоба Қазақстан Республикасы Ішкі істер министрлігінің бастамасымен және Облыс әкімінің қолдауымен алғаш рет Қызылорда облысында іске асырылды. 539 бейнебақылау камералары және 49 жылдамдық өлшегіш құралдары орнатылып, аудандық кіші Жедел басқару орталықтары жаңғыртылды. Аталған жобаға облыстық бюджеттен 2 млрд.240 млн. теңге қаржы бөлінді.
— Дәурен Серікұлы, өзіңізге көп рақмет! Сұхбат барысында саладағы ақжолтай жаңалықтар мен түйінді түйткүлдерге қанық болдық. Секторға серпіліс жасайды деп сенеміз, жұмысыңызға сәттілік!  
Сұхбаттасқан Шернияз Жалғасбекұлы
Артқа
Алдыңғы

Басқа да жаңалықтар

Басқа да жазбалар:Әлеумет

Пікір қалдырыңыз

Ваш адрес email не будет опубликован. Обязательные поля помечены *